Ekki á borði borgarráðs að aflétta leynd af verðmati

Björn Ingi Hrafnsson, formaður borgarráðs, segir það ekki á borði ráðsins að aflétta leynd af verðmati Gagnaveitu Reykjavíkur, áður Línu.neti, eins og fulltrúar Samfylkingarinnar hafi haldið fram.

Samfylkingin í borginni sendi frá sér tilkynningu í morgun þar sem greint var frá því að meirihluti sjálfstæðismanna og framsóknarmanna í borgarráði hafi í morgun hafnað beiðni Samfylkingarinnar um að létta leynd af verðmatinu. Bauðst meirihlutinn til þess að greina frá verðmatinu á næsta borgarráðsfundi en þá sem trúnaðarmáli.

Björn Ingi segir í samtali við Vísi að stjórn Orkuveitu Reykjavíkur, móðurfélags Gagnaveitunnar, hafi ákveðið að gefa ekki upp verðmat Gagnaveitunnar og það sé því í höndum þeirrar stjórnar að aflétta leyndinni. Bendir Björn Ingi á að fleiri aðilar en Reykjavíkurborg komi að stjórn Orkuveitunnar. Ákveðið hafi verið að vísa málinu til næsta stjórnarfundar Orkuveitunnar en ekki hefur verið ákveðið hvenær hann verður.

Aðspurður hvort hann sé fylgjandi því að leynd verði aflétt að verðmatinu segir Björn Ingi það verði að meta slíkt í hverju tilviki fyrir sig. Hann bendir á að verðmat sé gert til þess að meta stöðu félags og framtíðarhorfur þess. Um leið og menn geri verðmat opinbert versni samningsstaða ef til sölu komi. Menn séu þá að sýna á spil sín.

„Það er hins vegar ekki búið að taka neina ákvörðun um sölu í þessu tilviki og ég tel ekki heppilegar aðstæður á markaði til að selja nú. Þetta er efnilegt fyrirtæki með bjarta framtíð og ég fagna því að vel hafi tekist til með rekstur þess," segir Björn Ingi um Gagnaveituna.