Lithái í farbanni vegna framsalsmáls

Hæstiréttur staðfesti í dag farbann yfir Litháa vegna framsalsmáls hans sem yfirvöld hér á landi hafa til meðferðar. Verður maðurinn í farbanni til 10. desember samkvæmt úrskurði Hæstaréttar.

Forsaga málsins er sú að yfirvöld í Litháen fóru fram á framsal mannsins í byrjun september vegna þjófnaðarbrota sem hann er grunaður um þar í landi. Dómsmálaráðherra ákvað að fallast á framsalsbeiðnina í byrjun október og var sú ákvörðun staðfest fyrir Héraðsdómi Reykjavíkur.

Hins vegar felldi Hæstiréttur ákvörðun dómsmálaráðherra úr gildi fyrr í þessum mánuði vegna þess að hjá lögreglustjóranum á höfuðborgarsvæðinu voru fjögur mál þar sem maðurinn var grunaður um þjófnað, eignaspjöll, umferðarlagabrot og fíkniefnalagabrot hér á landi.

Maðurinn var svo dæmdur í Héraðsdómi Reykjaness þann 9. nóvember fyrir þjófnað, eignaspjöll og umferðarlagabrot og þann 12. þessa mánaðar tók dómsmálaráðherra á ný ákvörðun um að framselja manninn til Litháen. Maðurinn hefur kært þá ákvörðun og er hún nú til meðferðar hjá Héraðsdóms Reykjavíkur. Því var farið fram á farbann yfir manninum.