Brotthvarf bandaríska varnarliðsins frá Íslandi ber vott um skammsýni með hliðsjón af miklum hagsmunum Bandaríkjamanna af því að fyllsta öryggis sé gætt á siglingaleiðum olíu- og gasflutningaskipa.
Þetta sagði Björn Bjarnason dómsmálaráðherra í erindi sem hann flutti í Belfer Center í Havard-háskólanum í Bandaríkjunum í gær. Þar ræddi ráðherra um loftslagsbreytingar og hlut Íslands í öryggismálum á Norður-Atlantshafi.
Fram kemur á vef dómsmálaráðuneytisins að ráðherra hafi í erindi sínu bent á vaxandi hlutverk lögreglu og landhelgisgæslu við öryggisgæslu á sjó og landi. Ekki væri skynsamlegt að beita herflota við að gæta öryggis á siglingaleiðum eða til að leysa úr deilum um yfirráð á Norðurpólnum. Þá hvatti hann til þess að samstarf yrði aukið milli landhelgis- og strandgæslna á Norður-Atlantshafi.
Ráðherra mun í dag heimsækja stöð bandarísku strandgæslunnar í Boston en hún starfar í nánum tengslum við Landhelgisgæslu Íslands.
