Sýknuð af skaðabótakröfu vegna meintrar líkamsárásar

Héraðsdómur Reykjavíkur sýknaði í dag tvær konur og tvo karla af skaðabótakröfu manns sem sagði þau hafa ráðist á sig eftir dansleik á Patreksfirði árið 2004.

Vildi hann að viðurkennt væri með dómi að þau væru skaðabótaskyld vegna áverka sem hann hlaut í meintri líkamsárás, en fólkinu var gefið að sök að hafa slegið og sparkað í manninn þannig að hann meiddist á úlnlið og fæti.

Fólkið neitaði að hafa ráðist á manninn og sagði hann hafa dottið eftir að hafa flúið þegar hann sá til fjórmenningana. Við fallið hafi hann meiðst. Leit dómurinn svo á að áverki mannsins á fæti hefði komið til vegna fallsins og því væri um óhappatilvik að ræða.

Fyrir lá í málinu að önnur konan hefði sparkað í manninn en að mati dómsins var talið ósannað að hún hefði valdið þeim áverkum sem tilgreindir voru í kærunni. Benti dómurinn enn fremur á að maðurinn hefði ekki kært meinta líkamsárás til lögreglu.

Fram kemur að mál vegna þessa hafi upphaflega verið höfðað í maí 2005 en fellt niður síðar á því ári að ósk þess sem krafðist skaðabóta nú. Maðurinn fékk síðan gjafsókn í málinu í fyrra og höfðaði þá þetta mál og segir dómurinn að gjafsóknin virðist vera það eina sem breyst hafi á milli málaferlanna.

Vísaði dómurinn til þess að sannanir skorti fyrir því að fjórmenningarnir hefðu veitt manninum áverka og enn fremur að það lægi fyrir að stefnandinn sjálfur hefði ekki áhuga á málaferlunum ef mið væri tekið af afskiptaleysi hans í málinu.