Áfram í gæsluvarðhaldi vegna gruns um morð

Hæstiréttur staðfesti í dag gæslvarðhaldsúrskurð héraðsdóms yfir manni sem grunaður er um að hafa orðið öðrum manni að bana í fjölbýlishúsi við Hringbraut í byrjun október. Skal maðurinn sæta gæsluvarðhaldi til 20. desember.

Fram kemur í gæsluvarðhaldsúrskurðinum að maðurinn sé sterklega grunaður um að hafa sunnudaginn 7. október slegið fórnarlamb sitt ítrekað í höfuðið með slökkvitæki þegar fórnarlambið lá sofandi í rúmi sínu með þeim afleiðingum að það lést.

Það var maðurinn sem liggur undir grun sem tilkynnti lögreglunni um að hinn látni lægi rænulaus í rúmi sínu en þeir voru nágrannar. Í úrskurðinum segir enn fremur að við athugun lögreglu á vettvangi hafði hinn grunaði verði með nýlegt hrufl á fingri og þá mátti sjá á höndum hans duft úr slökkvitæki. Gat kærði ekki gefið viðhlýtandi skýringu á tilkomu áverka og dufts á höndum sínum. Enn fremur fann lögregla úlpu með blóðblettum á í íbúð hins grunaða.

Myndbandsupptökur úr öryggismyndavélakerfi í húsinu sýna enn fremur þann grunaða í úlpu sem líkist mjög úlpu þeirri sem fannst blóðug í íbúð hans.

Við yfirheyrslur hefur maðurinn ýmist játað eða neitað að hafa orðið nágranna sínum að bana en hann bar við minnisleysi sökum ölvunar og fíkniefnaneyslu við skýrslutöku 24. október. Rannsókn málsins er vel á veg komin og býst lögregla við að ljúka henni áður en gæsluvarðhaldstíminn rennur út.