Erlendir mótorhjólamenn spóla á hálendi Íslands

Á sama tíma og sjóstangveiði er að vaxa sem grein í ferðaþjónustu er önnur ný í vexti sem reyndar hefur farið fram hjá flestum. Vélhjólamenn sem vilja vaða á vegleysur inn til fjalla eru nýr hópur ferðamanna sem á eftir að láta að sér kveða í íslenskri ferðaflóru.

Stór hópur belgískra vélhjólakappa kom af hálendinu í borgina í gær og gáfu íslenskum vegum einkunn sem menn eiga ekki að venjast hér. "Þessir vegir eru frábærir," sagði Peter Thys forsprakki hópsins, sem taldi sjö ökuþóra en þeir voru í félagi við sænska vélhjólamenn.

Hjólakapparnir eru vanir utanvegaakstri en sóru og sárt við lögðu að þeir hefðu aldrei farið út fyrir vegslóðana í ferð sinni á Íslandi. "Við fórum aldrei út af troðningunum, við berum virðingu fyrir náttúrunni og vitum að hún er viðkvæm," sagði Thys.

Hópreið kappanna vakti athygli vegfarenda í Reykjavík enda eru hjólin þeirra frumstæð að sjá og líklegri til að glíma við torfærur og háskaslóðir til fjalla en asann í borginni. Þeir þurftu eiginlega að rétta út hönd til að beygja eins og títt er að menn geri á reiðhjólum.

Belgísku hjólamennirnir fara árlega í reisur í Evrópu. Ísland er besta landið sem þeir hafa sótt heim. "Allt er á heimsmælikvarða á Íslandi," sagði Thys, "nema verðlagið."

Hann hrósaði heita vatninu í hástert en sagðist hlakka til að fá sér belgískt súkkulaði og belgískan bjór við heimkomuna.

"Ég mun mæla með Íslandi við hvern sem er," sagði Thys að lokum og brosti breitt.