Eftirlitsátaki vegna erlendra starfsmanna hleypt af stokkunum

Vinnumálastofnun hleypir í dag af stokkunum sérstöku eftirlitsátaki með fyrirtækjum vegna erlendra starfsmanna. Átakið ber nafnið Allt í ljós og er unnið í samstarfi við Félagsmálaráðuneytið og ASÍ.

Átakið mun standa yfir um allt land en með sérstaka áherslu á fyrirtæki í byggingariðnaði á höfuðborgarsvæðinu eftir því sem segir í tilkynningu frá Vinnumálastofnun. Þar segir enn fremur að að stofnunin hafi í gær sent 1600 fyrirtækjum bréf og vakið athygli á átakinu.

Markmið átaksins er þríþætt. Að starfsemi erlendra fyrirtækja sem hér starfa sé í samræmi við íslensk lög og kjarasamninga og að innlendir atvinnurekendur tilkynni ráðningar starfsmanna sem eru ríkisborgarar í átta af hinum tíu nýju EES-ríkjum. Enn fremur að tryggja að vinnuveitendur virði réttindi erlends launafólks og að lokum að gefa þau skilaboð að ekki sé annað liðið en að fyrirtæki, innlend sem erlend virði íslensk lög.

Sex menn í fullu starfi við eftirlit

Átaki Vinnumálastofnunar stendur í tvo mánuði og munu sex starfsmenn Vinnumálastofnunar sinna því í fullu starfi, fjórir á höfuðborgarsvæðinu, einn á Selfossi og annar á Egilsstöðum. Auk þess munu tveir starfsmenn til viðbótar hafa það að hlutastarfi að aðstoða við eftirlitsþáttinn á höfðuborgarsvæðinu.

Eftirlitinu verður þannig að fyrirtæki verða heimsótt og óskað eftir nafnalistum yfir útlendinga sem þar starfa. Komi eitthvað athugavert í ljós eða skráningu er ábótavant er fyrirtækjunum veittur tíu daga frestur til að lagfæra skráningu og afhenda ráðningarsamninga og eftir atvikum þjónustusamninga aðila.

Trúnaðarmenn stéttarfélaga á vinnustöðum eða stéttarfélög hafa heimildir til að biðja um afrit af launaseðlum eða öðrum gögnum er staðfesti launagreiðslur og önnur starfskjör hlutaðeigandi starfsmanna. Verði fyrirtækið ekki við kröfunni getur Vinnumálastofnun óskað eftir upplýsingum sem stofnunin telur nauðsynleg.

Dagsektir og vinnustöðvun

Fái Vinnumálastofnun upplýsingar sem gefa til kynna að brotið sé gegn íslenskum lögum og reglum mun stofnunin afhenda hlutaðeigandi eftirlitsstjórnvaldi, einkum lögreglu, skattyfirvöldum, Útlendingastofnun og Vinnueftirliti ríkisins eftir atvikum upplýsingarnar.

Verði fyrirtæki hins vegar ekki við beiðni Vinnumálastofnunar um að skrá erlenda starfsmenn eða veita umbeðin gögn mun stofnunin beita þvingunaraðgerðum eins og dagsektum eða tímabundinni stöðvun á starfsemi.