Of lítið af sérmenntuðu fólki í upplýsingatækni

Geir H. Haarde forsætisráðherra ávarpaði ráðstefnuna "Upplýsingatækni - á leið úr landi?"  og gerði að umtalsefni að of lítið framboð væri af sérmenntuðu fólki í upplýsingatækni hérlendis. "Staðan sem nú virðist blasa við er sú að viðvarandi skortur er á fólki með menntun á sviði upplýsingatækni og áhugi framhaldsskólanema fyrir því að sækja nám á því sviði er of lítill," segir Geir.

"Ein af forsendum þess að upplýsingatækniiðnaðurinn fái þrifist hér á landi er að nægt framboð sé af menntuðu fólki, ekki síst fólki með sérmenntun á sviði upplýsingatækni," segir Geir. "Síðastliðið vor hóf störf óformlegur vinnuhópur sem mun fara yfir þetta mál. Staðan sem nú virðist blasa við er sú að viðvarandi skortur er á fólki með menntun á sviði upplýsingatækni og áhugi framhaldsskólanema fyrir því að sækja nám á því sviði er of lítill. Að þessari vinnu koma forsætis- og menntamálaráðuneyti ásamt fulltrúum háskólanna, iðnaðarins og ýmissa hagsmunaaðila."

Fram kom m.a. í máli forsætisráðherra að ríkisstjórnin hefur ákveðið að móta nýja stefnu um upplýsingasamfélagið sem ná mun til áranna 2008-2011. Skipuð verður stefnumótunarnefnd sem fær það veganesti að stefnan eigi m.a. að byggjast á fyrrnefndri stefnuyfirlýsingu. Á næstu mánuðum er því tækifæri til frjórra skoðanaskipta um öll málefni sem snerta upplýsingatæknina, hvort sem þau varða upplýsingtækniiðnaðinn, fjarskiptamálin, rafræna stjórnsýslu eða annað þessu tengt.