Hundaeigandi hótar ritstjóra

Ritstjóra héraðsblaðsins Skessuhorn barst í gær alvarlegar hótanir frá hundaeiganda á Akranesi vegna fréttar um árásarhund á vefútgáfu blaðsins. Í gær var greint frá því á vefnum að schäfer hundur, sem gengur þar laus, hafi ráðist að fólki í bænum og veitt því áverka.

Í samtali við Vísi vildi Magnús Magnússon, ritstjóri Skessuhorns, ekki láta hafa neitt eftir sér vegna þessara hótana og vísaði á skrif sín á vefnum. Þar segir að honum hafi borist alvarlega hótanir frá eiganda hundsins vegna fréttaflutnings í gær og hafi fréttin af þeim sökum verið tekin burt tímabundið í gærkvöldi.

Dýraeftirlitsmaðurinn á Akranesi sagði í samtali við Vísi að hundaeigandinn hefði einnig hótað sér. Þá barst blaðamönnum Vísis og Bylgjunnar símtal í morgun þar sem lýst var megnri óánægju með fréttaflutning miðlanna af málinu. Sá sem hringdi vildi ekki gera grein fyrir sjálfum sér en sagðist þekkja til eiganda hundsins.

Ritstjóri Skessuhorns hefur eftir lögreglunni á Akranesi að hundurinn gangi ennþá laus og sé falinn einhvers staðar fyrir utan bæinn.