Þrír fluttir á slysadeild eftir árekstur lögreglubíls og fólksbíls

Þrír menn, þar af tveir lögreglumenn, voru fluttir á slysadeild eftir að lögreglubíll og fólksbíll rákust saman á mótum Kringlumýrarbrautar og Suðurlandsbrautar um þrjúleytið.

Lögreglubíllinn mun hafa verið í forgangsakstri austur Laugaveg og ók gegn rauðu ljósi. Fólksbíllinn var á leið norður Kringlumýrarbraut og rákust þeir harkalega saman á gatnamótunum. Lögreglumennirnir munu ekki hafa slasast alvarlega í árekstrinum en ekki liggur fyrir hvort ökumaður hins bílsins, sem fluttur var á sjúkrahús, hafi meiðst alvarlega.

Töluverðar umferðartafir urðu á gatnamótunum á fjórða tímanum vegna slyssins.