Þursaflokkurinn og Caput í Laugardalshöll

Hinn íslenzki Þursaflokkur og Caput hópurinn munu þann 23. febrúar næstkomandi leiða saman hesta sína og halda tónleika í Laugardalshöll, en um þær mundir fagnar Þursaflokkurinn 30 ára afmæli sínu.

Samtals telja sveitirnar tvær um 30 hljóðfæraleikara og munu þeir flytja öll helstu lög Þursaflokksins í viðhafnarútsetningum. Guðni Franzon hefur verið fenginn til að stjórna hljómsveitinni og þá verður frumflutt ný svíta eftir Ríkarð Örn Pálsson sem mun byggja á Þursamúsíkinni.

Þursaflokkurinn kom fyrst saman í febrúar 1978 og starfaði óslitið til 1982. Tónlist sveitarinnar hefur notið mikilla vinsælda í gegnum árin en hana skipa þeir Ásgeir Óskarsson á trommum, Egill Ólafsson söng- og hljómborðsleikari, Rúnar Vilbergsson á fagott, Tómas Magnús Tómasson á bassa og Þórður Árnason á gítar. Eyþór Gunnarsson verður svo staðgengill Karls Jóhanns Sighvatssonar heitins á Hammond orgelinu.

Í tengslum við tónleikana mun Endurmenntunardeild Háskóla íslands standa fyrir námskeiði þar sem verður fjallað um íslenska tónlistararfinn, hvert Þursar sóttu efniviðinn auk þess sem nýjar útsetningar verða kynntar.