Samfylkingin svíkur kosningaloforð segja andstæðingar virkjana í Þjórsá

Guðfinnur Jakobsson bóndi í Skaftholti segir að Samfylkingin sé að svíkja kosningaloforð verði virkjanir í neðri hluta Þjórsár að veruleika. Heimamenn sem eru andsnúnir virkjununum þremur hittu iðnaðarráðherra að máli í vikunni og segja að hann hafi ekki útilokað að tekið yrði eignarnám vegna framkvæmdanna.

Össur Skarphéðinsson sagði við Stöð 2 í dag að hann hefði aldrei gefið það út, hvorki á fundum með andstæðingum virkjana við Þjórsá, né annars staðar að hann styddi hugsanlegt eignanám.

Guðfinnur, bóndi í Skaftholti við Þjórsá, telur að fari sem horfir sé Samfylkingin að svíkja kosningaloforð sín sem snúast um það sem hann kallar algjöra stöðvun á frekari virkjunarframkvæmdum.

Andstæðingar virkjana segjast núna róa lífróður gegn virkjunaráformum Landvirkjunar og komu saman í dag við minni Þjórsárdals þar sem mikið land á að fara undir vatn að þeirra sögn. Þar hafa andstæðingar virkjunar sett upp skilti til að sýna hvar vatnsyfirborðið verður, komi til virkjunar í Þjórsá.

Ólafur Sigurbjörnsson í Forsæti við Þjórsá segir að ekki sé einungis við virkjunarframkvæmdir að etja í baráttunni við Landsvirkjun og stjórnvöld, heldur sé áformað að setja niður virkjun á miklu sprunugusvæði sem geti haft geigvænlegar afleiðingar.

Þá segir Ólafur að ekki sé staðið eðlilega að virkjunarframkvæmdum því sami aðili hanni virkjunina og sjái um áhættumat vegna hennar.