Miklar líkur á eldgosi á næstunni

Miklar líkur eru á að eldgos verði á Íslandi á næstunni, að mati Páls Einarssonar jarðeðlisfræðings.. Nokkrar þekktar eldstöðvar eru að gera sig líklegar til goss og aðrar eru í startholunum. Jarðhræringarnar norðan Vatnajökuls gætu allt eins bent til eldgoss sé í aðsigi í Kverkfjöllum eða Öskju.

Tíðir skjálftar við Upptyppinga, norðan Vatnajökuls undanfarna mánuði og dýpt þeirra benda til þess að að eldgos gæti verið í aðsigi á svæðinu. Eins og við greindum frá í fréttum okkar í gærkvöldi þá hefur eftirlit með svæðinu verið aukið og jarðvísindamenn fylgjast grannt með því en skjálftarnir þykja mjög óvenjulegir.

Páll Einarsson, jarðfræðingur sagði í samtali við Fréttastofu í gærkvöldi að ómögulegt væri að segja til um hvar hugsanlegt gos gæti brotist út á svæðinu, það gæti allt eins brotist út í Öskju, nú eða í Kverkfjöllum eða einhvers staðar allt annars staðar.

Og það eru fleiri eldstöðvar að gera sig líklegar til að gjósa á næstunni. Í samtali við Bítið á Bylgjunni í morgun sagði Páll að Hekla væri tilbúin til og gæti gosið hvenær sem er innan fárra ára, Grímsvötn væru að fylla kvikuna en væru líklega ekki alveg tilbúin enn og að Katla væri búin að vera að gera sig gildandi um þónokkuð skeið.