Samningur í skoðun í sjö ár

Íslenska ríkið hefur undirritað en ekki fullgilt þrjá samninga sem snúa að baráttu gegn alþjóðlegu mansali, skipulagðri glæpastarfsemi og hryðjuverkum.

Fastafulltrúi Íslands undirritaði Palermo-samning Sameinuðu þjóðanna gegn alþjóðlegri glæpastarfsemi árið 2000, en hann bíður enn fullgildingar. Hins vegar hafa ákvæði samningsins verið innleidd að nokkru leyti í íslensk hegningarlög. Þannig var tekið tillit til hans við lagabreytingar árið 2003 og varð það til þess að mansal var gert refsivert á Íslandi.

Samningur Evrópuráðsins gegn mansali var undirritaður árið 2005 og hefur heldur ekki verið fullgildur. „Við vildum sjá þróunina og þær lagabreytingar sem hafa verið gerðar í löndunum í kring um okkur. Það þarf að skoða mjög vandlega hvað samningurinn felur í sér,“ segir Ragna Árnadóttir, skrifstofustjóri í dómsmálaráðuneytinu.

Að auki fer refsiréttarnefnd dómsmálaráðuneytisins yfir samning Evrópuráðsins um varnir gegn hryðjuverkum og ætlar að afgreiða alla samningana í einu.

Spurð hvort eðlilegt megi teljast að alþjóðasamningar séu svo lengi í skoðun, segir Ragna að samningarnir taki til mjög flókinna refsiréttarlegra atriða. Til dæmis sé Palermo-samningurinn viðamikill og nokkurn tíma hafi tekið að þýða hann. Hún á þó von á því að refsiréttarnefnd skili af sér tillögum í haust.