Lindsay nær nýjum lægðum

Hollywoodstjarnan og vandræðagemsinn Lindsay Lohan er enn og aftur umfjöllunarefni fjölmiðla. Nú er því haldið fram að áfengismeðferð sem hún fór í hafi engan árangur borið. Lindsay hafi meira að segja neytt áfengis meðan á meðferðinni stóð.

Lindsay Lohan hélt upp á 21 árs afmæli sitt með vinum og vandamönnum meðan hún var í áfengismeðferð. Hún fékk sérstakt leyfi frá meðferðarfulltrúum sínum til að fagna þessum merka áfanga og var sérstaklega tekið fram að hvorki áfengi né fíkniefni yrðu höfð um hönd í veislunni. Breska Heimsfréttablaðið telur sig hafa öruggar heimildir fyrir því að leikkonan hafi sjálf neytt áfengis í miklu magni í veislunni. Í kjölfarið hafi meðferðarfulltrúar hennar skipað henni að ganga með ökklaband sem skynjar þegar hún neytir áfengis.

„Lindsay sagði að veislan yrði róleg og þar myndu gestir drekka gos og borða pitsur. Hún var hins vegar staðráðin í að hrynja í það sjálf og var alltaf að laumast til að blanda vodka út í Red Bull,“ segir einn gestanna í veislunni. „Það voru líka margir sem heyrðu hana spyrja hvort einhver væri með alsælu eða önnur eiturlyf fyrir hana,“ segir gesturinn ennfremur.

Í ofanálag hefur leikkonan aftur tekið saman við vandræðagemsann Calum Best, son fótboltamannsins George Best, sem var þekktur alkóhólisti og kvennabósi. Calum hafði skömmu áður haldið framhjá Lindsay. Hann kom aftur á móti færandi hendi með demantsarmband sem metið er á 1,2 milljónir króna. „Hún fyrirgaf honum allt saman. Vandamál Lindsay er að hún hreinlega elskar allt sem er slæmt fyrir hana.“

Þegar starfsfólk meðferðarheimilisins komst að því að Lohan hefði neytt áfengis í veislunni heimtaði það að hún myndi hér eftir ganga með ökklabandið sem greinir áfengisneyslu. Að sögn vina hennar vildi Lindsay ekki að fólk kæmist að þessu og því hefur hún lýst því yfir að það hafi verið hennar ákvörðun að ganga með ökklabandið. „Hún á enn langt í land með að ná stjórn á áfengis- og fíkniefnaneyslu sinni. Sama hvað á gengur og hvað hefur komið fyrir, hún vill alltaf bara skemmta sér.“