Sölunni á eignum NATO vísað til umboðsmanns alþingis

Einar Thorlacius, sveitarstjóri Hvalfjarðarsveitar, segir að allar líkur séu á að málsmeðferðinni við söluna á eigum NATO í Hvalfirði verði vísað til umboðsmanns Alþingis.

„Sveitarstjórnin hefur falið mér að fara yfir þetta mál frá upphafi en það er ljóst að við erum síður en svo hrifnir af þeim vinnubrögðum sem viðhöfð voru við söluna," segir Einar í samtali við Vísi. „Raunar teljum við alveg forkastanlegt hvernig staðið var að málinu."

Einar segir að hann hafi haft samband við bæði Árna Þór Sigurðsson, þingmann Vg, og fjármálaráðherra vegna málsins. Sem kunnugt er af fréttum sendi Árni Þór fjármálaráðherra fyrirspurn um söluna nýlega og þótti svörin sem hann fékk ekki viðunandi.

Það var Skeljungur sem átti hæsta boð í eignirnar eða rúmlega 400 milljónir króna. Einar segir að forstjóri Skeljungs og tæknimaður fyrirtækisins hafi nýlega komið í heimsókn. Fundur hafi verið haldinn með þeim og þeir síðan skoðað eignirnar en meðal þeirra er ein fullkomnasta olíubirgðastöð á Íslandi.

„Svæðið er enn óskipulagt og ljóst að við höfum engar skyldur gagnvart Skeljungi við skipulag svæðisins," segir Einar. „Vinnan við skipulagið er hafið og ætti að ljúka á einu ári en síðan þarf að leita umsagna hjá ýmsum aðilum við þær hugmyndir sem fram koma í nýju skipulagi."