Rýtingur í bak fráfarandi borgarstjóra frá eigin flokksmönnum

Alfreð Þorsteinsson, fyrrverandi borgarstjórnarfulltrúi og formaður stjórnar Orkuveitunnar, er á því að borgarfulltrúar Sjálfstæðismanna hafi svikið oddvita sinn og því hafi ekki verið unnt að halda samstarfinu áfram við Sjálfstæðisflokkinn.

Alfreð sagði á fundi Framsóknarmanna í Reykjavík í dag að Björn Ingi Hrafnsson, borgarfulltrúi Framsóknar, hefði sýnt pólitískan kjark með því að slíta samstarfinu við Sjálfstæðismenn.

Alfreð segir að það hafi blasað við öllum að Vilhjálmur Þ. Vilhjálmsson, fráfarandi borgarstjóri, hefði ekki notið trausts borgarfulltrúa úr eigin flokki.

Það hefði því verið vonlaust fyrir Björn Inga að halda áfram samstarfinu við slíkar aðstæður.

Alfreð er á því að í raun hafi borgarstjórnarfulltrúar Sjálfstæðismanna gengið svo langt að reka rýting í bakið á eigin oddvita.

Alfreð vildi ekki gefa mikið fyrir að hann væri maðurinn á bak við það meirihlutasamstarf sem nú er komið á í borginni. Hann sagði þó að skyndilegt brotthvarf sitt úr nefnd um byggingu nýs hátæknisjúkrahúss hefði aukið svigrúm sitt til að sinna áhugamálum sínum.

Óskar Bergsson, varaborgarfulltrúi Framsóknarflokksins, var hins vegar á því að Alfreð hefði komið meir að málum en hann vildi staðfesta.

Hann sagði á fundinum í dag að um leið og Guðlaugur Þór Þórðarson, heilbrigðisráðherra, hefði rekið Alfreð frá málefnum hátækni-spítalans hefði Alfreð getað einbeitt sér að því að fella meirihlutann í borgarstjórn.