Vill að íþróttastyrkir verði frádráttarbærir frá skatti

Lagt er til að íþróttastyrkir fyrirtækja til starfsmanna verði frádráttarbærir frá skatti samkvæmt frumvarpi sem nú hefur verið lagt fram á Alþingi. Í greinargerð með frumvarpinu kemur fram að með þessu megi draga úr kostnaði heilbrigðiskerfisins.

Flutningsmaður frumvarpsins er Lúðvík Bergvinsson, þingmaður Samfylkingarinnar. Þar er lagt til að þær fjárhæðir sem fyrirtæki leggja fram til að tryggja heilsu starfsmanna til dæmis með forvarnaraðgerðum, læknisskoðunum og framlögum til starfsmanna til íþróttaiðkana verði frádráttarbærar frá skatti. Einnig er lagt til að styrkirnir verði frádáttarbærir frá skatti hvað einstaklinga varðar.

Fram kemur í greinargerð með frumvarpinu að með þessu megi stuðla að betri heilsu almennings og þannig draga úr kostnaði heilbrigðiskerfisins.