Skógareldar ógna heimilum í Malibu

Skógareldar hafa eyðilagt á annan tug heimila í Malibu í Kaliforníu í dag. Fjöldi íbúa hefur þurft að flýja heimili sín vegna eldanna sem berast hratt um svæðið. Engar fréttir hafa borist af meiðslum á fólki. Hundruð slökkviliðsmenn berjast við eldana en jörð er skraufaþurr þar sem þeir loga og engin rigning í kortunum.

Myndir sem sýndar hafa verið á sjónvarpsstöðvum vestanhafs sýna eldtungur gleypa heimili í hlíðum Malibu en ekki er vitað hversu mörg hús hafa orðið eldinum að bráð.

Engar fregnir hafa borist að meiðslum á fólki eftir því sem segir á CNN fréttastöðinni.

Íbúar um eitt hundrað heimila á þremur svæðum í Malibu voru fluttir á brott. Neyðarskýli hefur verið komið upp í skóla á skammt frá.

Upptök eldsins eru til rannsóknar en þau áttu sér stað klukkan 3:30 að morgni að staðartíma. Rúmlega 600 hektarar lands hafa brunnið og hinir þurru Santa Ana vindar ýta undir útbreiðslu eldsins á svæðinu. Vindarnir eru hnúkaþeyr frá Klettafjöllum og eru að sækja í sig veðrið. Það voru einmitt Santa Ana vindarnir sem héldu lífi í skógareldunum í Kaliforníu í síðasta mánuði. Þá létust 12 manns, 15 þúsund hektarar lands brunnu og 63 heimili eyðilögðust. Auk þess flúði hálf milljón manna undan eldunum.