Umdeild mynd af Harry prins

Forsíða septemberútgáfu bandaríska tímaritsins Radar hefur valdið mikilli reiði á meðal almennings í Bretlandi en hún sýnir fáklæddan Harry prins sitjandi í hásæti með bjór í hendi.

Myndin af Harry er að sjálfsögðu unnin í tölvu og gerð á þann hátt að höfuð Harrys er komið fyrir á uppstilltum líkama. Myndin á að endurspegla þá ímynd sem Harry hefur skapað sér með líferni sínu undanfarin ár, en þar sést hann klæddur í nærbuxur og náttslopp með glennta fætur.

Umfjöllun tímaritsins fjallar um villt líferni Harrys og er því haldið fram að prinsinn sé fyllibytta af verstu gerð og eiturlyfjaneytandi þegar svo ber til. Rætt er við ýmsa heimildarmenn innan bresku konungsfjölskyldunnar sem segja sögur af partístandi Harrys fram eftir nóttu og er meðal annars sagt frá því að Harry hafi misst af endurfundum menntaskóla síns fyrir skemmstu þar sem hann var enn að sofa úr sér ölvun frá kvöldinu áður. Þá er sagt frá því að Harry hafi fyrr á árinu verið skipað af Karli föður sínum að taka sér tak og fara að haga sér betur.

Þetta er langt frá því að vera í fyrsta sinn sem orðspor hins 22 ára gamla Harrys bíður hnekki og hefur hann lengi haft orð á sér fyrir að vera vandræðagripur fyrir konungsfjölskylduna. Neyðarlegar myndir af honum hafa birst reglulega í fjölmiðlum en svo virðist sem flestum sérfræðingum bresku götublaðanna um málefni konungsfjölskyldunnar þyki myndbirting Radar vera fyrir neðan beltisstað og hreinlega dónaleg.

Myndin lýsi andúð Bandaríkjamanna á bresku konungsfjölskyldunni og myndbirtingin jaðri við að flokkast undir sama eineltið og Díana prinsessa varð fyrir hjá fjölmiðlum vestra á sínum tíma. Fólk í Bretlandi er almennt talið reitt vegna málsins og telur að illa sé vegið að prinsinum.

Talsmaður konungsfjölskyldunnar vildi ekki tjá sig um málið í gær.