Bjarni Ármannsson setti persónulegt met

Bjarni Ármannson, fyrrverandi forstjóri Glitnis lét sig ekki vanta í Reykjavíkurmaraþonið sem fram fór í dag. Hann hljóp heilt maraþon og setti persónulegt met þegar hann lauk hlaupinu á þremur klukkutímum og 21 mínútu.

„Þetta gekk bara ágætlega," sagði Bjarni í samtali við Vísi. „Ég kom reyndar heim frá Bandaríkjunum í gær og síðan vaknaði ég ekki fyrr en 22 mínútur voru þangað til ræst var úr startholunum. En þeetta kom ekki að sök þar sem ég bætti tímann minn frá því síðast."

Á myndinni er Bjarni í fríðu föruneyti kvenna sem stóðu að söfnuninni „Göngum saman," sem er fjársöfnun fyrir frekari rannsóknum á brjóstakrabbameini, en hann hljóp einmitt fyrir þann málstað í dag. „Þessar konur fóru einmitt hálft maraþon í dag og þær hafa skilað frábæru starfi," segir Bjarni.

Bjarni er mjög ánægður með daginn og hvernig til hefur tekist. „Þetta er bara rosalega gaman, frábært veður og það er stórkostlegt að sjá hvernig maraþonið er að virka sem vettvangur fyrir verðugar safnanir."