Fljúgandi fundaherbergi í höfuðstöðvum Kaupþings

„Það er í anda bankans að fara ótroðnar slóðir og þetta á eftir að gera umhverfið í nýja húsinu skemmtilegra," segir Svali Björgvinsson, framkvæmdastjóri starfsmannasviðs Kaupþings. Farið er að sjá undir lok framkvæmdanna við viðbyggingu höfuðstöðva bankans í Borgartúni og mun hluti nýju byggingarinnar verða tekinn í notkun af starfsmönnum um helgina. Óhætt er að fullyrða að nýja byggingin sé afar glæsileg á að líta og þá ekki síður innandyra. Gegnsæ fundarherbergi sem virðast hanga niður úr lofti byggingarinnar vekja þar sérstaka athygli en ekki er vitað til þess að þau eigi sér hliðstæðu hér á landi.

„Við köllum þetta fljúgandi fundarherbergin," segir Svali en um er að ræða alls sex fundarherbergi, 10-15 fermetrar á stærð, sem hengd eru upp í loft með þunnum járnstútum. Veggir herbergjanna eru úr gleri en af eðlilegum ástæðum er gólfflöturinn það ekki. Fundarherbergin líta því út eins og stór glerkassi sem nánast svífur í lausu lofti, en 40 sentímetra langar brýr tengja þau við skrifstofuganginn.

„Hluti af hugsuninni á bak við herbergin er að nýta plássið sem best en við vildum einnig prófa eitthvað sem enginn annar hefur gert," segir Svali og bætir við að fljúgandi fundarherbergin setji sannarlega svip sinn á höfuðstöðvarnar. „Hvað burðarþol varðar er þetta mikið afrek og hönnunin er einstök. Við hlökkum mikið til að taka herbergin í notkun," segir Svali.