Telur flugmenn hafa brugðist hárrétt við

Framkvæmdastjóri flugfélagsins JetX, sem á flugvélina sem hafnaði utan flugbrautar á Keflavíkurflugvelli í fyrrinótt, telur að flugmenn vélarinnar hafi brugðist hárrétt við þeim aðstæðum sem komu upp í lendingunni.

Eins og fram hefur komið í fréttum rannsakar Rannsóknarnefnd flugslysa atvikið. Fram kemur á heimasíðu nefndarinnar að í aðflugi að Keflavíkurflugvelli hafi áhöfn JetX-vélarinnar fengið þær upplýsingar að bremsuskilyrði hafi verið góð en með ís á stöku stað. Hins vegar hafi áhöfnin orðið vör við að bremsuskilyrðin voru ekki eins og hún bjóst við og þegar ljóst var að flugvélin myndi ekki stöðvast fyrir brautarendann reyndi flugstjórinn að beygja út af brautinni og inn á akbraut. Þá rann vélin í hálku og hafnaði með hægra aðalhjól og nefhjól utan akbrautar.

Þurftu að grípa til harðrar lendingar

Ingimar Haukur Ingimarsson, framkvæmdastjóri JetX, segir að áhöfn vélarinnar hafi í gær gefið skýrslu hjá Rannsóknarnefnd flugslysa og þá hafi forsvarsmenn fyrirtækisins einnig rætt við áhöfnina.

Hann vísar í orð á heimasíðu Rannsóknarnefndar flugslysa um aðdraganda lendingarinnar og segir lendingarskilyrði ekki hafa verið góð. Flugmennirnir hafi þurft að grípa til svokallaðrar harðrar lendingar til þess að tryggja að vélin fengi gott grip en vélin sé byggð fyrir slíkt. Flugmennirnir hafi svo reynt að bremsa en flugbrautin hafi verið flughál og því hafi ekki verið við neitt ráðið. „Ég skil vel að upplifun farþega hafi ekki verið þægileg og fólki bregður þegar vélin lendir harkalega. Þetta var hins vegar gert af öryggisástæðum og samkvæmt verklagsreglum," segir Ingimar.

Hann segist treysta því að upptökur úr flugritanum, sem sendur er til Englands til rannsóknar, staðfesti það sem fram hafi komið og að flugmennirnir hafi staðið rétt að málum.

Flugvélin aftur í áætlunarflug síðar í dag

Aðspurður á Ingimar von á því að vélin fari aftur í loftið síðar í dag. Flugfélagið hafi kallað til sérfræðinga erlendis frá til að fara yfir vélina. Þeir hafi skoðað hana og myndað í bak og fyrir og sent myndir til framleiðandans, Boeing. Framleiðandinn hafi í morgun sent ábendingar um að skoða ætti sjö atriði og þegar sé búið að kanna fimm þeirra. Skoðun hinna tveggja atriðanna ljúki síðar í dag og þá geti vélin haldið áfram áætlunarflugi sínu fyrir ferðaskrifstofuna Primera.