Áhrif fíkniefnafundar kemur fram eftir tvo mánuði

Þórarinn Tyrfingsson, yfirlæknir á Vogi, segir að það komi í ljós eftir einn til tvo mánuði hvaða áhrif umtalsverður fíkniefnafundur á síðustu vikum hafi á fíkniefnamarkaðinn. Hann segist ekki hafa orðið var við það hjá sjúklingum á Vogi að þeir kvarti undan fíkniefnaþurrð í landinu.

Fram kemur í Fréttablaðinu í dag að í Tollgæslan á Suðurnesjum hafi lagt hald á um 800 grömm af fíkniefnum í fjórum málum sem komið hafa upp á Keflavíkurflugvelli á rúmum tveimur vikum. Í öllum tilvikum var um kókaín eða amfetamín að ræða og bætist þetta magn við um 40 kíló af fíkniefnum sem hald var lagt á í Fáskrúðsfjarðarmálinu í september. Fréttablaðið hefur eftir heimildarmanni sem kunnugur er fíkniefnaheiminum að smygltilraunirnar á Keflavíkurflugvelli séu til marks um ákveðinn skort á markaðnum eftir Fáskrúðsfjarðarmálið.

Þórarinn Tyrfingsson segir að forstöðumenn SÁÁ geti ekki fullyrt um það hvort skortur sé á fíkniefnum hér á landi en þeir hafi ekki orðið varir við að sjúklingar kvarti yfir því. Hann segir verð á fíkniefnum hafa hækkað tímabundið eftir stórar haldlagningar og að von sé á verðkönnun á næstu dögum sem leiða muni í ljós hvort fíkniefni hafi hækkað mikið í verði að undanförnu. „Eins og er er ekkert sem bendir til þess að það sé önnur staða nú en áður þegar hald hefur verið lagt á mikið af fíkniefnum," segir Þórarinn. Hann segir stórar haldlagningar hafa haft ótrúlega lítil áhrif á markaðinn hingað til að mati manna hjá SÁÁ.

Þórarinn segir enn fremur að menn sjái það betur eftir einn til tvo mánuði hvaða áhrif fíkniefnafundurinn á Fáskrúðsfirði og á Keflavíkurflugvelli hafi. „Ég vona að við sjáum þá verðið hækka og að fólk kvarti undan fíkniefnaþurrð," segir Þórarinn.