Íslenskir auðmenn skrá einkaþotur sínar á Caymaneyjum

Engin íslenskur forstjóri eða stórfyrirtæki hafa látið skrá einkaþotur sínar á Íslandi, en þær eru orðnar að minnstakosti fimm og tvær hið minnsta munu vera væntanlegar.

Fjögur hundruð og sjö flugvélar voru skráðar hér á landi um síðustu áramót, samkvæmt skráningu Flugmálastjórnar og hafði fjölgað um tíu á árinu. Af heildarfjöldanum voru 82 stórar flugvélar og þotur, 29 léttari vélar eins og til dæmis Fokkervélar Flugfélags Íslands, og hátt í 300 litlar vélar í eigu ýmissa aðilla.

Stærsti flugrekandinn í fyrra var Atlanta með 31 þotu og næst Icelandair með 22 þotur skráðar hér.

Íslensku auðmennirnir skrá flestar sínar þotur á Caymaneyjum skammt frá Kúbu í Mið-Ameríku. Það er breskt sjálfsstjórnarsvæði og alþjóðleg skattaparadís, sem sést best af því að íbúar eru aðeins 43 þúsund, en 68 þúsund fyrirtæki úr öllum heiminum er skráð þar.