Aldrei stærra skemmtiferðaskip í Reykjavík

Stærsta skemmtiferðaskip sem nokkru sinni hefur komið til Íslands lagðist að bryggju í Sundahöfn í morgun.

Skemmtiferðaskipið Grand Princess er engin smásmíð, skipið er alls um 109 þúsund brúttólestir og var um tíma stærsta skemmtiferðaskip heims. Það er núna það tuttugasta og þriðja í röðinni yfir slík skemmtiskip.

Farþegafjöldi getur verið á fjórða þúsund og áhöfn telur um ellefu hundruð manns.

Á Grand Prinsess eru engar kojur og klefar því skipið hefur 710 herbergi sem hafa meira að segja einkasvalir auk þess sem heilt dekk hefur einungis glæsisvítur fyrir farþega.

Um borð er kapella þar sem skipstjórinn hefur í nógu að snúast við að gefa saman pör á ferðalögum um heimshöfin.

Úr lofti er skipið afskaplega tignarlegt og ef menn vilja bara spóka sig á dekkinu þá er göngufærið prýðisgott, skipið er 290 metra langt eða eins og þrír knattspyrnuvellir.

Það ristir líka djúpt, heila 8 metra.

Um borð í þessu mikla skipi eru margir áhugaverðir afþreyingarkostir einsog spilavíti, pútt golfvöllur með níu holum, listasafn, íþróttavellir, verslanir, barir og veitingastaðir þar sem reiddar eru fram kræsingar frá öllum heimshornum.

Skipið lagði frá Reykjavík nú síðdegis og heldur áleiðis til Southampton í Englandi.