Þyrlan fylgist með þungri umferð

Um helgina hefur lögreglan lagt þunga á að fylgjast með hraðakstri og til þess notaði hún þyrlu Landhelgisgæslunnar. Oddur Árnason, yfirlögregluþjónn á Selfossi segir að þyrlan hafi skilað mjög góðum árangri og hafi verið notuð víða um land um helgina.

Selfosslögreglan tók sjö ökumenn í nótt fyrir of hraðan akstur. Á annan tug ökumanna hafa verið kærðir fyrir of hraðan akstur nærri Höfn í Hornafirði um helgina og lögreglan á Suðurnesjum hafði í nógu að snúast. Ökumaður á bifhjóli reyndi að stinga lögregluna þar af í nótt en hann var mældur á 133 km. hraða á klst. þar sem hámarkshraði er 50 km.

Lögreglan náði að stöðva ökumanninn en hann hafði ekki réttindi til þess að aka bifhjóli..

Ökumaður var stöðvaður á Hafnarvegi í Reykjanesbæ sem hafði sett númeraplötur af annarri bifreið á sína eigin, þar sem hún var hvorki skráð né tryggð. Átta ökumenn voru kærðir á Reykjanesbrautinni fyrir of hraðan akstur og þrír voru teknir fyrir að aka ölvaðir.

Ökumaður var handtekinn undir áhrifum fíkniefna af lögreglu í Borgarnesi auk þess sem nærri tugur ökumanna var tekinn fyrir of hraðan akstur í umdæmi lögreglunnar þar. Lögreglumaður í þyrlu Landhelgisgæslunnar tók auk þess allmarga fyrir sömu sakir á sömu slóðum.

Fyrir fréttir á Stöð 2 í kvöld hafði umferð gengið áfallalaust að mestu en tvennt slasaðist þó á Humarhátíðinni á Höfn í Hornafirði í gærkvöld þegar tveir bílar skullu saman. Þá slasaðist tvennt í gær í slysi í Biskupstungum þegar bíl var ekið aftan á annan, en meiðsl á fólki eru ekki talin alvarleg.