Íslendingar eiga að losa sig við jarðefnaeldsneytið

Ef eitthvert land í heiminum ætti að geta skipt úr jarðeldsneyti fyrir aðra og betri kosti er það Ísland. Þetta segir prófessor við tækniháskólann í Colorado.

Masami Nakagawa starfar við Colorado School of Mine í Bandaríkjunum. Skólinn hefur nú gert samstarfssamning við RES Orkuháskólann á Akureyri á auðlinda- og orkusviði og segir doktor Nakagawa að margt sé hægt að læra af Íslendingum vegna sérstöðu landsins í orkulegu tilliti.

Prófessorinn bendir á að fjöldi bíla, ekki síst á götum Reykjavíkur, sé gríðarlegur og bílarnir mengi ekki bara heldur séu eldsneytiskaupin þjóðinni kostnaðarsöm. Vegna þess hve hátt hlutfall orku á Íslandi er endurnýjanlegt telur hann að Íslendingar eigi fyrstir þjóða að stefna að því að skipta út bensíni og olíu fyrir aðra vistvænni orkugjafa.

Samningurinn milli skólanna tveggja kveður á um rannsóknir, kennslu og nemendaskipti og er mikil viðurkenning fyrir Orkuháskólann á Akureyri segir forstöðumaður.