Grunaðir um skjalabrot og brot á vinnulöggjöf

Grunur leikur á að GT verktakar og Nordic Construction Line hafi gerst sek um skjalabrot og brot gegn vinnulöggjöfinni. Málið er komið inn á borð ríkislögreglustjóra.

Starfsmenn fyrirtækjanna hafa verið að störfum við Hraunárveitu Kárahnjúkavirkjunnar um nokkurt skeið. Vinnueftirlitið gerði athugasemd við það að launaseðlar starfsmannanna bæri ekki saman við þau laun sem starfsmennirnir vitnuðu um. 13 starfsmenn frá Lettlandi leituðu síðan til Afls starfsgreinasambands og sögðu á sér brotið og að þeim hafi verið hótað ef þeir leituðu réttar síns. Í morgun bættust átta starfsmenn við sem höfðu svipaða sögu að segja. Vitnaleiðslur hefjast yfir þeim á morgun.

Málið hefur verið sent til ríkislögreglustjóra en þar á bæ fer efnahagsbrotadeildin með rannsókn málsins. Grímur Grímsson, yfirlögregluþjónn hjá efnahagsbrotadeildarinnar sagði í samtali við fréttastofuna grun leika á að fyrirtækin hafi gerst sek um skjalabrot og brot á vinnulöggjöf.

Nordic Construction Line sendi frá sér yfirlýsingu vegna málsins í dag þar sem rannsókninni er fagnað. Þá segir að fjölmiðaumfjöllun síðustu daga hafi órökstuddar ásakanir og dylgjur forsvarsmanna AFLs starfsgreinafélags verið áberandi. Að öðru leyti sér fyrirtækið ekki ástæðu að svara einstökum ásökunum AFLs.