Sátt um að halda völdum í Reykjavík

Svandís Svavarsdóttir, borgarfulltrúi Vinstri - grænna, segir að sáttaniðurstaða sjálfstæðismanna í málefnum Reykjavik Energy Invest sé sátt um áframhaldandi völd í Ráðhúsinu í Reykjavík og að viðhalda völdum Framsóknarflokksins í borginni. Svandís segir í yfirlýsingu að niðurstaðan sé ekki sátt um vinnubrögð, heiðarleika eða samráð heldur sátt um að selja fyrirtækið hið fyrsta án þess að lykilspurningum hafi verið svarað.

„Hvað er Reykjavík Energy Invest? Hvað á þetta fyrirtæki? Enn hefur ekki verið lagður fram listi yfir eignir þess. Á að einkavæða hlut fyrirtækisins í Hitaveitu Suðurnesja? Á að einkavæða sérþekkingu Orkuveitu Reykjavíkur? Á að einkavæða fyrirtækið á grundvelli verðmats Hannesar og Bjarna? Hverjir munu kaupa aðrir en þeir sem þegar hafa eignast umtalsverðan hlut í fyrirtækinu? Var samruni fyrirtækjanna löglegur yfir höfuð? Þessum spurningum hefur ekki verið svarað," segir Svandís.

Svandís segir enn fremur ljóst að Vilhjálmur Þ. Vilhjálmsson borgarstjóri hafi teflt mjög alvarlega af sér í málinu. Hann hafi farið á bak við borgarbúa, samflokksmenn sína innan og utan borgarstjórnar sem og aðra kjörna fulltrúa í borgarstjórn. Hann hafi farið á svig við lög og tekið þátt í ósiðlegu atferli sem ofbjóði fólki um allt land. „Fólk vill ekki slíka stjórnendur. Borgarbúar treysta ekki slíkum borgarstjóra þótt borgarfulltrúar Sjálfstæðisflokksins virðist greinlega ekki gera sömu kröfur," segir Svandís að lokum í yfirlýsingu sinni.