Haukur kemur af fjöllum

Haukur Leósson, fráfarandi stjórnarformaður Orkuveitu Reykjavíkur, kom af fjöllum þegar fréttastofa innti hann eftir viðbrögðum við því að borgarstjórnarflokkur Sjálfstæðisflokksins hygðist láta hann víkja vegna málefna Reykjavik Energy Invest.

Hann vildi ekki tjá sig um málið að svo stöddu. Greint var frá því á blaðamannafundi borgarfulltrúanna eftir fund með borgarstjóra í Ráðhúsinu í dag að Haukur myndi víkja úr stjórn OR og að borgarfulltrúar myndu framvegis sitja í stjórninni. Ekki liggur fyrir hver tekur við stjórnarformennsku hjá Orkuveitunni.

Haukur Leósson tók við stjórnarformennsku í Orkuveitunni í júní síðastliðnum af Guðlaugi Þór Þórðarsyni og til stóð að hann sæti fram á næsta ár þegar Björn Ingi Hrafnsson, borgarfulltrúi Framsóknarflokksins og formaður borgarráðs, tæki við.