Langþreyttir á manneklu, álagi og lágum launum

Aðaltrúnaðarmaður hjúkrunarfræðinga á Landspítalanum segir þá orðna langþreytta vegna manneklu, álags og lágra launa. Hún segir launastefnu hins opinbera í hjúkrunar- og umönnunarstörfum út í hött.

Hátt í hundrað hjúkrunarfræðinga vantar til starfa á Landspítalann. Nýlega sagði spítalinn upp samningum við þjónustufyrirtækin Alhjúkrun og Inpro sem hafa útvegað tugi hjúkrunarfræðinga til starfa. Eva Hjörtína Ólafsdóttir, aðaltrúnaðarmaður hjúkrunarfræðinga á Landspítalanum, segir ástandið á spítalanum mismunandi eftir deildum.

Oft sé einn hjúkrunarfræðingur með átta sjúklinga á sinni könnu. Í bandarískri rannsókn sem landlæknir vitnaði í fyrir rúmu ári vegna mannekluvanda spítalanna var sýnt fram á að dánartala á sjúkrahúsum var lægri þegar hjúkrunarfræðingur sinnti einungis fjórum sjúklingum en mun hærri þar sem hjúkrunarfræðingur sinnti átta sjúklingum.

Eva segir ekki hægt að meta mannslífin í peningum. Brýnt sé að hækka grunnlaunin í næstu kjarasamningum. Sem dæmi nefnir Eva að hjúkrunarfræðingur með 20 ára starfsreynslu fái 260 þúsund krónur í grunnlaun.