Kaupþing rannsakað í kjölfar Carnegie-málsins

Hið svokallaða Carnegie mál í Svíþjóð teygir nú anga sína um öll Norðurlöndin. Sænska fjármálaeftirlitið hefur hafið rannsókn á átta öðrum norrænum bönkum þar á meðal Kaupþing banka. Hinir bankarnir eru HQ Bank, Erik Penser Fondkommission, SEB, Swedbank, Öhman og Handelsbanken. Þetta kemur fram í blaðinu Wall Street Journal í morgun.

"Við viljum kanna nánar þær fjármálastofnanir sem notað hafa svipuð viðskiptaferli og tíðkuðust í Carnegie," segir Helena Östman talsmaður sænka fjármálaeftirlitsins í samtali við blaðið. "Við teljum eðlilegt að skoða þeirra starfsemi í ljósi vandamálanna sem upp hafa komið í Carnegie."

Carnegie málið snýst öðrum þræði um meint ólögleg innherjaviðskipti í bankanum. Málið hefur þegar valdið vandræðum innan sænsku ríkisstjórnarinnar þar sem fyrrum starfsmenn bankans hafa þurft að segja stöðum sínum lausum hjá ríkinu þeirra á meðal náinn samstarfsmaður sænska viðskiptaráðherrans.