Íslenskur bruggari í stórsókn

Bjórum Ölgerðarinnar Egils Skallagrímssonar hlotnuðust þrenn gullverðlaun á nýafstaðinni Monde selection bjórkeppni í Belgíu. Sem bruggmeistari Ölgerðarinnar er það Guðmundur Mar Magnússon sem á heiðurinn af stórsókninni í bjórbruggi.

Á tveimur árum hafa bjórar Ölgerðarinnar hlotið níu verðlaun í alþjóðlegum keppnum, sem hlýtur að teljast ansi góður árangur. „Ja, það þykir mér að minnsta kosti,“ sagði Guðmundur hæversklega. Bjórarnir sem verðlaunaðir voru eru Gull, Lite og Premium, en þeir tveir síðastnefndu eru sköpunarverk Guðmundar. „Gullið er hins vegar frá forverum mínum komið,“ sagði Guðmundur. Gullbjórnum vinsæla var þó breytt dálítið fyrir um ári síðan, þegar Guðmundur prófaði að nota íslenskt bygg til bruggsins, en það er jafnframt notað í Premium.

„Við erum náttúrulega alltaf að fínstilla þetta hjá okkur og alltaf að reyna að bæta okkur. Miðað við þetta virðumst við vera að þokast í rétta átt,“ sagði hann. Guðmundur vildi ekki kannast við að eiga allan heiður af verðlaununum og sagði bruggið mikið samspil. „Ég á minn part af þessu, en það þarf allt að smella saman til að þetta gangi upp. Við þurfum að vera með réttu uppskriftirnar og passa að þetta sé gert á réttan hátt, þar kem ég inn. Svo verðum við að velja hráefni af kostgæfni og tækjabúnaðurinn og starfsmennirnir skipta öllu máli. Þetta er mikið og flókið ferli,“ sagði hann.