RÚV skráð á lögheimili útvarpsstjóra

„Bíddu, ha?" voru fyrstu viðbrögð útvarpsstjórans Páls Magnússonar þegar honum var bent á að Ríkisútvarpið ohf. væri skráð á lögheimili hans í símaskránni á netinu. Síðan skellti hann upp úr. „Þetta finnst mér alveg ótrúlegt. Það er allavega ljóst að Ríkisútvarpið er ekki rekið frá mínu heimili," sagði Páll hlæjandi og bætti við að þetta hljóti að vera mistök af hálfu Símaskrárinnar.

Samkvæmt símaskránni er Ríkisútvarpið ohf. ekki aðeins með aðsetur í Efstaleitinu heldur einnig á heimili útvarpsstjórans í Garðabænum, og á öðrum landsvæðum á borð við Reykhólahrepp, Egilsstöðum og Ísafirði.

Páll gat sér rétt um mistök Símaskrárinnar því þegar upplýsinga var leitað þar á bæ kom í ljós að um skráningarvillu var að ræða.

„Það hefur allavega ekki komið beiðni frá RÚV um að skrá stofnunina á heimilisfang yfirmannsins," sagði Guðrún María Guðmundsdóttir, ritstjóri Símaskrárinnar, í léttum dúr þegar hún var spurð um málið. „Þetta eru einfaldlega mistök og við munum leiðrétta þetta hið snarasta," bætti hún við.

Síðdegis í gær hafði skráningu Ríkisútvarpsins verið breytt og samkvæmt símaskránni hefur það nú aðeins aðsetur á einum stað, við Efstaleiti 1 í Reykjavík.