Kjalvegur illa farinn

Syðri hluti Kjalvegar er illa farinn eftir þurrka síðustu misseri. Vegurinn er heflaður á vorin en síðan er lítið sem ekkert viðhald á honum yfir sumartímann. Dæmi eru um að akstur yfir Kjöl taki hátt í fimm klukkustundir.

Þeir sem hafa lagt leið sína um Kjalveg að undanförnu hafa orðið verulega varir við þetta. Vegurinn er líkastur þvottabretti á köflum og á öðrum stöðum eru sprungur í honum sem í safnast vatn sem mynda eins konar læki. Þá er hann víða stórgrýttur og eru dæmi um að ferðin yfir Kjöl hafi tekið allt að fimm klukkustundir. Þrátt fyrir það er vegurinn sagður fólksbílafær á upplýsingavef Vegagerðarinnar. Staðarhaldari á Hveravöllum tekur undir mat Vegagerðarinnar en segir fólk verða að gera sér grein fyrir því að ekki sé hægt að aka hratt um veginn.

Kjalvegur er um 200 kílómetra langur og miðað við 5 klukkustunda akstur þá geta þeir sem ætla að aka þarna um gert ráð fyrir að aka á 40 kílómetra meðalhraða á klukkustund.

Þegar fréttastofa hafði samband við Vegagerðina í morgun fengust þær upplýsingar að þar sem Kjalvegur sé skilgreindur sem hálendisvegur þá er hann aðeins heflaður á vorin en síðan ekki söguna meir fyrr en að sumri loknu þrátt fyrir að vegurinn sé nokkuð fjölfarinn yfir sumartímann. Hins vegar var ákveðið að fara og kanna ástand vegarins núna vegna fjölda ábendinga að undanförnu um ástand hans. Starfsmenn Vegagerðarinnar eru nú á staðnum og verður ákvörðun um hvort ástæða sé til aðgerða eður ei tekin í framhaldi af þeirri skoðun.