Hinn íslenski Moe

Breiðholtið býður nú upp á nýjan bar sem ber kunnuglegt nafn eða Moe's bar. Aðdáendur Simpsons þáttanna ættu að kannast við nafnið en barinn í Simpsons heitir einmitt Moe's. Hinn íslenski Moe Breiðholtsins heitir Hjalti Ragnarsson og tók nýverið við rekstri barsins.

„Hann hét þessu nafni þegar ég keypti hann," segir Hjalti sáttur við nafnið og finnst ekkert athugavert við að vera hinn íslenski Moe. „Við erum ekki ennþá komin með Duff bjórinn en það er auðvitað til fullt af öðrum góðum bjórtegundum. Þetta er risastór bar og við erum með poolborð, tvo risastóra skjái, einkasal fyrir partý og afmæli og fleira spennandi," segir Hjalti og bætir því við að staðurinn sé nú þegar vel sóttur af hverfisbúum. „Reyndar er það þannig að tveir barir í Breiðholtinu eru að loka og því fer samkeppnin minnkandi. Við ráðum þó alveg við aukna aðsókn þar sem þetta er gríðarlega stór staður eða 360 fermetrar."

Barinn er staðsettur við hliðina á Krónunni í Breiðholti og nú er bara spurning hvort að Moe's Bar verði vinsælasti staður fyrir símaat hjá hrekkjalómum hverfisins.