Siv boðar harða stjórnarandstöðu Framsóknar

Siv vildi ekkert segja til um það hvort Jón Sigurðsson yrði áfram formaður Framsóknarflokksins en samkvæmt heimildum Íslands í dag og fréttastofu Útvarps hefur hann tilkynnt nánustu samstarfsmönnum sínum að hann ætli að hætta. Sagði Siv að málið hefði ekki verið rætt á þingflokksfundinum.

Hún sagði að Framsóknarflokkurinn myndi veita harða stjórnarandstöðu á kjörtímabilinu enda væru framsóknarmenn minnugir þess í hversu slæmu ástandi velferðarkerfið var þegar þessi stjórnmálöfl skildu við eftir síðasta stjórnarsamstarf þeirra. Þessi ríkisstjórn sem nú væri að taka við væri frjálshyggjustjórn og Framsóknarflokkurinn myndi standa fast í fæturna á móti henni.