Ekki innlend mengunarheimild fyrir olíuhreinsistöð

Ekki er svigrúm er fyrir mikla mengun gróðurhúsalofttegunda frá olíuhreinsistöð miðað við núgildandi lög og alþjóðasamninga. Slík stöð yrði að leggja með sér mengunarkvóta frá öðru ríki eða kaupa hann á markaði.

Áform um olíuhreinsistöð á Vestfjörðum hefur vakið upp spurningar um mengun og mengunarhættu. Í Noregi eru nýtískulegar hreinsistöðvar reknar nálægt íbúðabyggð án teljandi árekstra. Á það við um þessa sem er rétt við Bergen og er jafnstór þeirri sem menn áforma að reisa vestra - líklegast í dýrafirði. Hafsteinn Helgason, verkfræðingur sem sérstaklega skoðaði þessi mál fyrir iðnaðaráðuneytið fyrir 10 árum segir að stöð sem heimsótt var nálægt Ósló væri í góðri sátt við umhverfið. Þar væri allt frárennsli hreinsað, lyktarmengun væri nánast engin og stöðin hin snyrtilegasta, enda öll vinnslan í lokuðum ferlum. Mikil pípuvirki og tankar einkenna þessar stöðvar.

Menn geta greint á um hættu af skipaflutningum með olíu en tíðar ferðir risaolíuskipa yrðu til landsins. Ólafur Egilsson, talsmaður Íslensk hátækniðiðnaðar sagði í fyrradag að skipin væru sértaklega styrkt til hafíssiglinga. Benti hann á að nú þegar væri mikil umferð olíuskipa í grennd við landið en með stöðinni kæmu til landsins risastórir dráttarbátar og mengunarvarnarbúnaður til að bregðast við mögulegum óhöppum. Mætti því segja að öryggið myndi aukast.

En það fylgir stöð af þessu tagi mengun gróðurhúsalofttegunda. Norska stöðin sem fulltrúar íslands skouðu fyrir 10 árum er helmingi minni en sú sem áformað er að reisa vestra en losar samt 315 þúsund tonn af koltvísýringi á ári og 1000 tonn af Brennisteinstvísýringi.

Magnús Jóhannesson, ráðuneytisstjóri í Umhverfisráðuneytinu segir að miðað við innlendar heimildir til losunar og alþjóðlegar skuldbindingar er ekkert svigrúm til að taka þetta inní mengunarbókhaldið - nema menn leggi með sér mengunarheimildir eða kaupi mengunarkvóta.

Ekki náðist í Ólaf Egilsson til að spyrja hann um það hvort Íslenskur hátækniiðnaður hefði aðgang að mengunarkvóta vegna áforma fyrirtækisins.