David Schwimmer vantar konu

Friendsleikarinn David Schwimmer hefur ákveðið að taka sér frí frá störfum. Oft er það önnur leið leikara til að segja að þeir hafi ekkert að gera en Schwimmer segir aðra ástæðu liggja að baki. Hann hefur ákveðið að taka sér sex mánaða leyfi til að verða sér úti um eiginkonu.

Hann segist hafa lagt svo hart að sér í vinnu í gegnum tíðina að einkalífið hafi orðið útundan. Í samtali við The Metro segist hann alltaf hafa sett leiklistina í forgang en nú eigi hann hvorki konu né fjölskyldu.

Kannski er von á auglýsingu frá kauða sem gæti hljómað eitthvað á þessa leið: Dökkhærður leikari, harðduglegur í vinnu óskar eftir konu á barneignaaldri sem er tilbúin til að skuldbinda sig.