Harðar ásakanir á hendur Topshop eru settar fram í breska blaðinu The Sunday Times. Tískuföt fyrirtækisins eru sögð framleidd í þrælakistum. Philip Green, eigandi Topshop, segist taka ásakanirnar alvarlega.
Tískufötin í Topshop eru framleidd í þrælaverksmiðjum í Máritíus samkvæmt grein í Sunday Times. Þar er meðal annars rætt við starfsfólk verksmiðjanna sem lýsir ástandinu sem afar slæmu. Hundruð manns frá Srí Lanka, Indlandi og Bangladess starfa í verksmiðjunum sem framleiða flíkur fyrir fyrirtækið Arcadia sem auk Topshop á búðir eins og Dorothy Perkins, Miss Selfridge, Burton, Evans og Topman. Eigandi fyrirtækisins er Sir Philip Green sem er einn ríkasti maður Bretlands.
Verksmiðjufólkið fær í sumum tilfellum minna en 25 krónur á tímann, tæpar 4.000 krónur á mánuði. Þau eru látin búa í þröngum fjölbýlum, vinna tólf tíma á dag, sex daga vikunnar, og eru rekin ef þau vinna ekki nógu hratt. „Það er mikil pressa á okkur að ná settum vinnumarkmiðum. Ef við náum ekki að framleiða fimmtíu flíkur á klukkutíma erum við rekin," sagði ein konan.
Jane Shepherdson var lengi í ábyrgðarstöðu hjá Topshop en hætti í fyrra. Hún lét þá þau orð falla að fólk gæti ekki keypt ódýr föt án þess að athuga hvernig aðstæðurnar í verksmiðjum væru. Arcadia er eitt af fáum fyrirtækjum í þessum geira í Bretlandi sem hefur ekki skrifað undir sérstaka samþykkt sem tryggir lágmarksaðstæður í verksmiðjum.
Á laugardaginn sagðist Green taka ásakanirnar alvarlega og að hann myndi athuga málið en sjálfur á hann ekki verksmiðjurnar heldur notar sjálfstætt reknar verksmiðjur sem framleiða föt eftir beiðni. Þó bætti hann því við að erfitt væri að fylgjast með aðstæðum í verksmiðjum sem hann ætti ekki sjálfur. „Ég sendi menn til að kanna verksmiðjurnar og aðstæður starfsfólksins. Ég get ekki staðið þarna sjálfur og talið hversu marga tíma fólk vinnur."
