Lögreglukona slasaðist í átökum í Hafnarfirði

Lögreglukona slasaðist í átökum við ölvaðan mann við verslunarmiðstöðina Fjörðinn í Hafnarfirði um klukkan sex í dag. Konan fór á slysadeild þar sem gert var að sárum hennar. Sauma þurfti nokkur spor í andlit og að sögn lögreglu kemur í ljós á morgun hve alvarleg meiðslin eru en óttast er að sprunga hafi myndast í kjálka.

Lögregla var kölluð að verslunarmiðstöðinni vegna manns sem hafði verið að abbast upp á unglingsstúlkur. Tvær lögreglukonur höfðu upp á manninum og lentu í framhaldinu í hörkuátökum við hann. Maðurinn náði að slá og sparka í aðra lögreglukonuna með fyrrgreindum afleiðingum.

Að lokum tókst konunum að yfirbuga manninn og færa hann í járn og verður hann vistaður í fangageymslum lögreglunnar í nótt. Hann reyndist mjög ölvaður og er að sögn lögreglu einn af góðkunningjum hennar.