Guðmundur og frú í mál við DV

Guðmundur Jónsson, fyrrverandi forstöðumaður Byrgisins, Helga Haraldsdóttir, kona hans, og Jón Arnarr Einarsson, fyrrverandi aðstoðarforstöðumaður Byrgisins, hafa ákveðið að höfða meiðyrðamál á hendur DV vegna umfjöllunar um þau í blaðinu í dag.

Í tilkynningu frá lögmanni þeirra kemur fram að þau telji sig rógborin með óásættanlegum hætti og að meiðyrðamál verði höfðað á hendur þeim sem beri ábyrgð á þeim óhróðri, dylgjum og hreinum ósannindum sem komi fram í blaðinu. Enn fremur kemur fram að lögmaðurinn og þremenningarnir hyggist ekki tjá sig frekar um málið í fjölmiðlum enda löngu komið nóg af slíkri umfjöllun.