Ríkisstjórnarflokkar hafi aðeins ákveðið að mynda ríkisstjórn

Steingrímur var gestur í hádegisviðtalinu á Stöð 2 þar sem hann ræddi flokksráðsfund Vinstri - grænna sem fram fer um helgina og nýja ríkisstjórn.

„Ég hef verið undrandi á því hvað viðbrögð stjórnarinnar hafa verið dauðyflisleg við ýmsu sem komið hefur upp, eins og þorskaflaniðurskurðinum og mótvægisaðgerðum og svona sem menn eru vandæðast og vaklast með. Ég held að það stafi að því í stjórnarsáttmálanum er áfkaflega lítið um það að gengið sé frá hlutum með skýrum hætti. Það vekur undrun á hversu almennum og fljótandi forsendum sérstaklega Samfylkingin fór inn í þetta samstarf. Það þýðir að þegar málin koma upp vita menn ekki fyrir hvað ríkisstjórnin stendur," segir Steingrímur.

Hann bendir sem dæmi á vandræðagang hjá stjórninni með fjármál sveitarfélaganna. Skoðanir í stjórnarflokkunum á því hvort og þá hvernig eigi að taka á fjármálum sveitarfélagnna séu jafnmargar og þeir sem tjáð sig hafa um málið. „Það er af því að stjórnin hefur ekki rætt þetta og það hefur ekki verið samið um neitt í þessum efnum þegar stjórnin var mynduð."

„Þetta er ávísun á það að eina ákvörðunin sem var tekin síðastliðið vor var að búa þessa ríkisstjórn til. Það var í raun og veru ekki gengið frá neinu öðru," segir Steingrímur.

Hann telur að Samfylkingin hafi samið af sér og sama stjórnarstefna sé við lýði fyrir og eftir kosningar. „Þetta er í aðalatriðum stefna Sjálfstæðisflokksins sem ræður ferðinni og er búin að gera hér í landinu síðustu 16 ár, því miður," segir Steingrímur. Samfylkingin hafi gefið upp sitt hlutskipti að vera mótvægi við Sjálfstæðisflokkinn.

Steingrímur segir eðlilegt að ríkisstjórnin fái sína hveitibrauðsdaga en hún hafi ekkert gert nema sagst ætla að gera allt fyrir alla og því ekki úr miklu fyrir stjórnarandstöðuna að moða. „En menn skulu hafa það alveg á hreinu og hafa engar áhyggjur af því að eftir því sem málin koma upp og viðfangsefnin falla til þá verður stjórnarandstaðan á sínum stað. Við munum sjá um það að í Vinstrihreyfingunni - gærnu framboði að veita þessari ríkisstjórn verðugt aðhald," segir Steingrímur.