Setur út á mat Standard og Poor's

Forsætisráðherra hefur ýmislegt út á mat Standard og Poor´s á horfum á lánshæfismati ríkisssjóðs að setja en það breytti í dag horfunum úr stöðugum í neikvæðar.

Vaxandi og þrálátt ójafnvægi í íslenska hagkerfinu og skortur á aðhaldi í ríkisfjármálum varð til þess að alþjóðlega matsfyrirtækið Standard og Poor's breytti horfum á lánshæfismati ríkissjóðs í dag í neikvæðar. Fyrirtækið segir vaxandi horfur á neikvæðri lendingu í efnahagsmálum Íslendinga. Matsfyrirtækið Standard og Poor´s er eitt af þremur helstu óháðu matsfyrirtækjununum í heiminum.

Geir H. Haarde forsætisráðherra segir ekki einhlítan rökstuðning liggja á bak við nýtt mat Standard og Poor's. Þannig hafi ríkisfjármálin batnað og ekki sé rétt sem haldið er fram í matinu að stýrivextir Seðlabankans hafi ekki virkað sem skildi.