Ólíkleg sviksemi ömmu

Ólánsamur ungur maður var nýlega handtekinn í Þýskalandi fyrir að reyna að versla með fölsuðum seðli. Í frétt vefútgáfu dagblaðsins Der Spiegel kemur fram að pilturinn hafi orðið hvumsa því seðillinn var kominn frá ömmu stráksa sem sendi honum hann í tilefni þess að hann kláraði vorprófin.

Það kom síðar á daginn að námsmaðurinn var svo æstur að eyða fúlgunni, 100 evrum, að hann gleymdi að lesa bréfið sem fylgdi frá ömmunni þar sem stóð að seðillinn væri ljósritaður en hún hefði millifært upphæðina á reikning barnabarnsins.

Boðskapur þessarar sögu er að sögn þýsku lögreglunnar sá að það sé ekki ástin sem geri menn blinda heldur blessaðir peningarnir.