Ríkið makað krókinn

Ríkið hefur makað krókinn með skattheimtu síðustu 10 árin segir framkvæmdastjóri Starfsgreinasambands Íslands. Hann segir loforð forsætisráðherra um frekari skattalækkanir verða að skila sér til allra. Starfsgreinasambandið vilji fremur sjá hækkaðar bætur.

 

Þing Starfsgreinasambandsins var haldið í dag og var yfirskriftin, Leiðréttum misréttið. Skúli Thoroddsen framkvæmdastjóri Starfsgreinasambandsins segir að á síðustu 10 árum hafi hið opinbera tekið til sín aukið fjármagn af þjóðartekjum. Því hafi tekjur ríkissjóðs tvöfaldast á þeim tíma.

Skúli segir að bilið milli ríkra og fátækra í íslensku samfélagi hafi aukist. Láglaunahópurinn hafi staðið eftir í öllu launaskriðinu. Hann segir loforð forsætisráðherra um frekari skattalækkanir verða að skila sér til allra. Starfsgreinasambandið hafi frekar viljað sjá bætur sem kæmu til móts við láglaunafólk.

Skúli segir brýnt að sátt náist milli stjórnvalda, atvinnurekenda og launafólks um næstu kjarasamninga. Enginn vilji óðaverðbólgu en hækka verði launin hjá fólki í lægst launuðu störfunum. Enn sé allt óráðið með nýja ríkisstjórn.