Þurfa að hætta íþróttaæfingum vegna ársfundar NATO þingsins

Á sjötta hundrað börn þurfa að hætta íþróttaæfingum í tíu daga vegna ársfundar NATO þingsins sem hefst á föstudaginn.

Undirbúningur var í fullum gangi í Laugardalshöllinni í dag. Rúmlega sjö hundruð gestir sækja fundinn og þar á meðal verða Jaap de Hoop Scheffer framkvæmdastjóri Atlantshafsbandalagsins, og rúmlega þrjú hundruð evópskir og bandarískir þingmenn.

NATO þingið er samstarfs- og samráðsvettvangur þingmanna 26 aðildarríkja bandalagsins. Á þinginu verður meðal annars rætt um samskiptin við Rússland og framtíð Kosovo héraðs.

Miklar öryggisráðstafanir hafa verið gerðar fyrir fundinn. Sett hafa verið upp öryggishlið sem allir gestir fundarins þurfa að fara í gegnum og leitað verður í öllum töskum og farangri. Auk þess verður löggæsla aukin á meðan á fundinum stendur og efirlit hert við bygginguna.

Á sjötta hundrað börn sem æfa íþróttir og dans í höllinni í vetur hafa þurft að hörfa annað vegna fundarins í 10 daga. Framkvæmdastjóri Íþróttabandalagsins í Reykjavík segir að íþróttafélögum hafi verið tilkynnt um fundinn með miklum fyrirvara og reynt hafi verið að koma öllum börnum fyrir á öðrum stöðum í nágrenninu.