Sjö af þeim fjórtán Litháum, sem handteknir hafa verið vegna umfangsmikils þjófnaðar á höfuðborgarsvæðinu, hafa verið úrskurðaðir í vikulangt gæsluvarðhald í Héraðsdómi Reykjavíkur. Mennirnir voru gripnir í gærkvöld og hafa verið yfirheyrðir vegna málsins í dag.
Hinir sjö, sem handteknir voru í morgun, verða yfirheyrðir í kvöld og þá ræðst það hvort farið verður fram á gæsluvarðhald yfir þeim.
Þýfi mannanna fannst á tveimur stöðum í austurbænum, hvort tveggja voru heimili manna sem tengjast málinu. Mun meira magn fannst í fyrri húsleitinni, þar á meðal snyrtivörur, fatnaður, tölvuhlutir og varningur úr stórmörkuðum. Átti einn mannanna pantað far úr landi í dag.
Að sögn Ómars Smára Ármannssonar, aðstoðaryfirlögregluþjóns hjá lögreglunni í Reykjavík, var það fyrir árvekni fangavarðar að lögregla komst á snoðir um málið. Ómar segir málið hafa átt nokkurn aðdraganda og að lögregla hafi fylgst með mönnunum.
Ómar segir aðspurður að mennirnir sem úrskurðaðir voru í gæsluvarðhald séu á aldrinum 22-28 ára gamlir en ekki liggur fyrir hvort þeir höfðu dvalarleyfi hér á landi. Ekki er heldur ljóst hvort þeim hafi tekist að koma einhverju þýfi úr landi en rannsókn lögreglunnar beinist meðal annars að því. Þá segir Ómar aðspurður að ekki liggi fyrir hversu mikils virði þýfið er sem fannst í dag.
