Tólf ríkisstofnanir fara gegn reglum fjármálaráðuneytisins

Tólf ríkisstofnanir reyndust með samtals 221 milljónar króna yfirdrátt á banakareikningi í lok síðasta árs samkvæmt skýrslu Ríkisendurskoðunar um endurskoðun ríkisreiknings síðasta árs. Bent er á í skýrslunni að samkvæmt reglum fjármálaráðuneytisins sé ríkisstofnunum bannað að fjármagna rekstur sinn með yfirdrættti í banka.

Þá kemur fram í skýrslunni að enn eigi fjölmargar ríkisstofnanir í erfiðleikum með að fylgja fjárlögum hvers árs. Sumar stofnanir fjármagni hallareksturinn með greiðslum úr ríkissjóði og fram kemur í skýrslunni að þær 75 stofnanir sem fóru meira en fjögur prósent fram úr fjárheimildum á árinu 2006 hafi fjármagnað hallann með 3,5 milljarða viðskiptaskuld við ríkissjóð.

Höfuðstóll ríkissjóðs styrkist verulega

Í skýrslu Ríkisendurskoðunar segir enn fremur að mikill afgangur hafi orðið á rekstri ríkissjóðs árið 2006 hafa höfuðstóll hans styrkst verulega. Bent er á að 115 milljarða króna afgangur hafi orðið rekstri ríkissjóðs árið 2005 og 82 milljarða í fyrra. Árangurinn í fyrra skýrist einkum af auknum skatttekjum og öðrum rekstrartekjum vegna þenslu í íslensku efnahagslífi.

Ríkisendurskoðun segir að almennt sé umhirða ríkisstofnana um bókhaldsgögn í góðu lagi og þá hafi dregið úr áætlunum skattyfirvalda í virðisaukaskatti á undanförnum árum. Þó séu eru enn um 26,2 milljarðar króna í eftirstöðvum. Nú sé gert ráð fyrir að einungis þrjú prósent af áætlun innheimtist. „Ríkisendurskoðun leggur til að fyrirtæki sem eru sannarlega ekki í rekstri en fá áætlanir verði afmáð úr fyrirtækjaskrá, samkvæmt heimild í lögum um hlutafélög og einstaklingshlutafélög. Þá leggur stofnunin til að skattyfirvöld fái heimild til að loka virðisaukaskattsnúmerum þeirra aðila sem eru í verulegum vanskilum," segir í tilkynningu Ríkisendurskoðunar.

Við endurskoðun ríkisreiknings ársins 2006 lagði Ríkisendurskoðun sérstaka áherslu á að lánardrottnar og skuldunautar ríkisins staðfestu stöðu sína gagnvart stofnunum eða fyrirtækjum ríkisins með formlegum hætti. Könnunin sýndi að í langflestum tilvikum er skráning fjárhæða í lagi. Örfáar undantekningar komu í ljós og hefur sérstaklega verið tekið á þeim málum og réttum aðilum bent á þau atriði sem þarfnast nánari skoðunar.